Fullt afurðastöðvaverð fyrir umframmjólk til áramóta

 

Frá ársbyrjun hefur orðið veruleg söluaukning í smjöri, rjóma, ostum, drykkjarmjólk og fleiri afurðum. Mjólkursamsalan býst við áframhaldandi sömu þróun næstu vikur og fyrirtæki í mjólkuriðnaði hafa ákveðið að kaupa alla framleiðslu bænda fullu afurðastöðvaverði frá októberbyrjun til áramóta. Samtök afurðastöðva í mjólkuriðnaði hafa einnig lagt til að greiðslumark næsta árs, sem er samanlagður framleiðsluréttur bænda fyrir innanlandsmarkað, verði aukin úr 116 milljónum lítra í 123 milljónir lítra.

 

„Íslenskir neytendur eru að auka neyslu mjólkurafurða og það er vitaskuld mikið ánægjuefni fyrir íslenska kúabændur“, segir Einar Sigurðsson, forstjóri Mjólkursamsölunnar. „Fyrirtæki bænda í mjólkuriðnaði leggur mikið uppúr vöruþróun og vörugæðum. Árangurinn er ótvíræður í sölu á nýjum vörum og gamalgrónum vörum á borð við til dæmis smjör.

Söluaukningu í smjöri milli ára má líkja við sprengingu. Þetta er mjög mikill hvati fyrir bændur og þeir hafa sett sér að mæta þessari auknu eftirspurn sem er fyrirsjáanleg áfram á næstu misserum.“

 

Nánari upplýsingar gefur

Einar Sigurðsson

s. 569 2200

Fréttatilkynning frá Mjólkursamsölunni ehf.